Plano sa kampo ni US President-elect Donald Trump nga iapela sa korte ang nahimong hukom sa hush-money case niini.
Sumala sa abogado niya nga si Todd Blanche, nga dili sila pabor sa nahimong desisyon sa korte hinungdan padayon nilang ipaglaban ang kaso.
Gibutyag usab ni Trump nga ang maong kaso usa ka butang aron gub-on ang iyang reputasyon.
Nangita lamang matod pa sila og mga kaso nga ikaguba sa iyang pangalan.
Gipahambog usab niini ang kadaugan niya kaniadtong November 2024 election kung asa nakakuha siya og pipila ka milyon nga boto.
Kahibaluan nga gihukman si Trump og unconditional discharge human sa iyang kombiksyon sa miaging tuig sa 34 ka ihap sa pagpanglimbong sa negosyo.
Diin ang kaso adunay kalabotan sa hush money payment ngadto kang Stormy Daniels aron mahilom sa panahon sa kampanya sa pagkapresidente sa 2016.
Nagpasabot ang unconditional discharge nga si Trump dili mapriso, makamulta, o mag-atubang sa probation, apan ang iyang kombiksyon magpabilin gihapon ug siya usa ka kombiktado nga kriminal.
Girekomenda sa mga prosecutors nga ang nasangpit nga sentensiya isip paagi sa pagpakita og respeto sa opisina sa Presidente ug sa umaabot nga inagurasyon niini.
Mitambong si Trump sa virtual nga pagdungog sa New York gikan sa iyang balay sa Florida, diin si Judge Juan Merchan miingon nga dili sila mopabor ni bisan kinsa bisan unsa pa ang ilang posisyon sa gobyerno.
Gikonsidera usab ni Merchan nga talagsaon ang maong kaso tungod kay naglisod sila sa pagpagawas sa maong kaso.
Kahinumduman nga ang abogado ni Trump mihangyo sa Korte Suprema nga i-postpone ang iyang sentensiya kung mahimo tungod kay hapit na siya molingkod isip presidente, apan kini gibasura.
Niadtong Mayo 30, 2024, napamatud-an nga sad-an si Trump sa tanang 34 ka ihap sa pagpalsipikar sa iyang business records sa first degree sa 12 ka hurado.
Gisugo matod pa niya ang iyang abogado kaniadto nga si Michael Cohen nga iuli ang $130,000 nga hush money ug bayran si Stormy Daniels aron magpakahilom bahin sa iyang relasyon uban ni Trump, nga siguradong makadaot sa iyang 2016 presidential bid.
Apan hugtanong gihipangmakak ni Trump ang tanan nga mga alegasyon.
Niadtong Nobyembre 19, 2024, ang Manhattan District Attorney’s Office nagpahibalo kang Judge Juan Merchan nga sila miuyon nga i-postpone ang sentensiya ni Trump, nga gikatakda sa Nobyembre 26, aron mahatagan og igong panahon ang gipaabot nga litigasyon sa gipaabot nga motion to dismiss nga ipasang-at sa kampo sa Pangulo.
Kaniadtong Nobyembre 22, 2024, si Judge Merchan nakahukom sa usa ka dili matino nga pag-postpone sa pagsentensiya ug gitugutan ang hangyo ni Trump nga mag-file og usa ka mosyon aron i-dismiss ang kaso.
Niadtong Enero 3, 2025, gibasura ni Merchan ang hangyo sa kampo ni Trump nga i-dismiss ang kaso tungod sa kadaugan niini sa eleksyon niadtong Nobyembre.
