Mipahayag si U.S. President Donald Trump nga iyang gimando ang mga negosyador sa Estados Unidos nga dili magdali sa posibleng kasabutan sa Iran, taliwala sa mga taho nga hapit na maabot ang usa ka deal aron mapagaan ang tensyon sa Middle East.
Sumala ni Trump nga maayo ug “constructive” ang dagan sa negosasyon, apan mas maayo matod pa nga dili kini pagdalion kay pabor pa sa Amerika ang panahon.
Sumala pa kaniya, magpabilin ang blockade sa Estados Unidos sa mga pantalan sa Iran hangtod nga makompleto, mapirmahan, ug mapatuman ang bisan unsang kasabutan.
Matud sa mga talaan, ang blockade gipahamtang sukad Abril 13 human sa nagkagrabeng tensyon tali sa U.S. ug Iran sa Strait of Hormuz, usa ka importante nga agianan sa suplay sa lana sa kalibutan.
Sa laing bahin, giingon sa tagapamaba sa Foreign Ministry sa Iran nga si Esmaeil Baqaei nga hapit na sila makabuhat og “framework agreement” nga adunay 14 ka probisyon isip kabahin sa peace talk.
Bisan pa niini, wala malikayan ang intriga sa bag-ong kasabutan tungod sa mga leaks sa posibleng detalye nga nakapabalaka sa pipila ka mambabalaod ug kanhing opisyal sa Washington.
Una nang gipahayag ni Trump nga halos kompleto na ang kasabutan apan kinahanglan pa gihapon ang pinal nga agreement sa dili pa kini hingpit nga matuman.
