Gibakwi ni U.S. President Donald Trump ang iyang hulga nga magpahamtang og 20% nga “reimbursement fee” sa mga kargamento nga moagi sa Strait of Hormuz.
Kini nahitabo wala pay 24 oras human niya kini unang gisugyot niadtong Lunes, Hulyo 13.
Imbis nga maningil sa mga barko og 20% nga bayranan, si Trump miingon nga kini pulihan sa usa ka komprehensibo nga kasabutan sa pamatigayon ug pamuhunan gikan sa lainlaing mga Estado sa Gulpo ngadto sa Estados Unidos.
Gibawi usab sa Presidente sa US ang sugyot human ang mga nasud sa Gulf Cooperation Council (GCC) nagpahayag og seryosong mga kabalaka.
Kini nga mga nasud nagkahiusa sa pag-ingon nga ang mga barko nga moagi sa estratehikong lugar dili angay masingil og toll o bayad.
Ang International Maritime Organization (IMO) sa United Nations diha-diha dayon nagpahayag sa ilang pagsupak.
Sumala kanila, walay legal nga basehan ubos sa internasyonal nga balaod alang sa pagpahamtang og mandatory fee o toll sa strait nga gigamit alang sa global shipping.
Kon mapatuman ang 20% nga taripa, ang mga eksperto nagpasidaan nga kini mahimong hinungdan sa dakong pagsaka sa presyo sa lana, gasolina, ug uban pang mga batakang palaliton sa tibuok kalibutan tungod kay ang Strait of Hormuz usa sa labing importante nga ruta sa suplay sa enerhiya.
Samtang, ang Estados Unidos magpadayon sa “hingpit nga pagbabag” niini sa mga barko sa Iran ug sa ilang mga kargamento.
Sumala ni Trump, ang Strait of Hormuz magpabilin nga bukas sa tanang nasud gawas sa Iran ug sa mga kustomer niini.
