Nakasinati og duha ka sunod-sunod nga kapakyasan sa korte ang administrasyon ni US President Donald Trump may kalabotan sa immigration, human gibabagan sa usa ka federal judge ang ‘proposed’ nga limitasyon sa mga visa ug misang-at usab og kaso ang kapin 20 ka estado batok sa bag-ong amendment sa pagkuha og residency status.
Temporaryong gipahunong ni US District Judge F. Dennis Saylor IV sa Boston ang proposal sa Department of Homeland Security o DHS nga magtakda og fixed time limits sa pagpabilin sa mga langyaw nga estudyante ug mga tigbalita sa US nga walay extension. Limitado unta sa upat ka tuig ang F ug J visas alang sa mga estudyante ug participants sa exchange programs, samtang 240 ka adlaw alang sa I visas sa mga langyaw nga tigbalita. Apan giingon sa huwes nga huyang kaayo ang rason sa DHS ug mahimong makahatag og dakong kadaot sa ekonomiya ug edukasyon sa nasud.
Sa lahi nga legal nga panaglalis, duha ka kaso ang gisang-at sa Manhattan federal court sa koalisyon sa 22 ka estado nga gipangulohan sa New York, California ug Illinois, uban sa unom ka siyudad ug county. Tumong sa kaso nga mapugngan ang regulasyon sa DHS nga magpalapad sa sukdanan sa public charge, diin mahimong isalikway o ideklarar nga inadmissible alang sa pagkuha og green card ang mga imigrante nga mogamit sa legal nga mga programa sa ayuda sa gobyerno.
Gikondena sa mga lokal nga opisyal, lakip na si New York City Mayor Zohran Mamdani, ang maong proposal ug miingon nga mahimo kini’g hinungdan nga likayan sa mga pamilyang imigrante ang mga pampublikong programa nga nagtabang sa ilang panglawas ug pagkaon. Giinsister sa mga petitioner nga milapas ang administrasyon sa iyang gahum tungod kay ang Kongreso lamang ang adunay eksklusibong awtoridad sa pagtakda sa mga pamantayan alang sa permanent residency.
Samtang, gidepensahan sa tigpamaba sa DHS ang ilang regulasyon ug miingon nga nahadlok lamang ang mga lider sa sanctuary states nga mawad-an og federal funding kung boluntaryong moundang ang mga dili kwalipikadong langyaw sa paggamit sa welfare programs sa Amerika.
