GENERAL SANTOS CITY – Padayong nagpaalim sa Dr. Jorge P. Royeca Hospital ang tricycle driver nga amahan nga gipusil sa CSU nga naka-assign sa nasampit nga ospital nga iyang nakalalis.
Giila ang biktima nga si Christian Caparos, 32 anyos, taga Brgy Bawing ning dakbayan.
Natigayon ang insidente alas-12:00 miaging gabii, sulod sa compound sa tambalanan.
Matud sa biktima, gisita siya sa suspek nga si Abad Abdul Pata, hamtong ang pangidaron, gumikan sa iyang pagparada sa traysikel.
Miresulta kadto sa panaglalis human gihingusgan sa biktima nga walay sayop sa pagparada niya sa iyang tricycle, kung asa mibunlot ug .45 caliber pistol ang suspek ug gipusil ang biktima sa makaduha ka higayon, sa aping ug bukton.
Hinungdan nga gi-admit usab kini sa naasoy’ng opsital, samtang ang suspek ang paspas usab nga misibat sa wala matinong direksyon.
Nasayran nga igo lamang unta naghatod ug salapi ang biktima alang sa iyang anak nga na-admit usab sa maong tambalanan, apan duha na hinuon sila nga nagpaalim karon.
Samtang, matud sa mga nakasaksi sa insidente, nahimo kadto sa suspek human matud pa siya gisinggitan ug “baboy” sa biktima, butang nga dakong insulto alang sa mga kaigsuunang muslim.
-0-
