GENERAL SANTOS CITY –Blangko pa ang kapulisan sa Polomolok, South Cotabato kalabot sa motibo ug ilhanan sa riding in tandem nga mipusil-patay sa usa ka tricycle driver kagahapon sa buntag.
Matud ni P/S/Insp. Romeo Albano Jr., nahitabo ang insidente sa Cannery Rd. Corner Blk 1 Docci Village, Polomolok.
Ang biktima giilang si Roger Dumabildo, 38 anyos, residente sa Prk. Peoples Village, Cannery Site, Polomolok.
Sa imbestigasyon, samtang namasada ang biktima ug may sakay nga lima ka pasahero, kalit nga may mitapad kaniya nga duha ka lalaki nga naka-helmet sakay sa usa ka motorsiklo nga walay plate number, ug gitiro ang biktima sa ulo.
Gilayong nahagba ang biktima ug nakabsan sa kinabuhi samtang nakalingkod pa sa iyang tricycle.
Gilayon usab nga nanagan ang iyang mga pasahero tungod sa tumang kahadlok.
Samtang ang mga suspek ang misibat matud pa paingon sa direksyon sa Cannery.
Gituuhang gisundan ang biktima sa mga suspek ug dihang may minaog nga pasahero, didto na giduulan sa mga suspek.
Gikabutyag nga ang gunman naka-short ug jacket ug nag-sunglass, samtang ang driver ang naka-itum nga jacket, maong nga pantalon ug naka-helmet.
Narekober sa crime scene ang empty shell sa .45 caliber pistol nga gikatakdang ipailawom sa ballistic examination sa Regional Crime Laboratory.
Sa karon padayon sa pagpangalap ang kapulisan ug dugang impormasyon, aron mailhan ang mga suspek ug matumbok ang motibo sa krimen.
