GENERAL SANTOS CITY – Padayong nagpaalim sa usa ka pribadong tambalanan dinhi sa siyudad ang usa ka tricycle driver nga gipusil human lamang nangusyoso sa natigayon nga kagubot sa usa ka bar sa J. Catolico Avenue ning siyudad.
Nagpabiling kritikal ang kahimtang sa biktima nga si Jomar Vasquez, 29-anyos, gumikan sa naangkon nga samad-pinusilan sa tiyan.
Base sa report, naki-usyoso lang ang biktima ug miduol sa usa sa mga apil sa kagubot ug nangutana, apan kalit na lang nga gipusil.
Matud usab Lagao Police Station, base sa ilang imbestigasyon, duha ka grupo nagrambol sulod sa bar miaging gabii.
Mihawa matud pa ang suspek ug sa dihang mibalik aron muresbak unta bitbit ang caliber 22 nga pusil.
Apan giduulan matud pa kini sa biktima, ug posibleng nagtuo nga kauban kini sa nakabangi, hinungdan nga gipusil sa tiyan.
Paspas matud pang nakasibat ang suspek ug mga kaubanan sakay sa usa ka sikad.
Samtang sa follow-up operation nasikop ang driver sa sikad nga gihimong getaway vehicle sa suspek, kung asa apil matud pa siyang makasuhan kon dili itug-an ang ilhanan sa suspek. Sa karon hustisya ang singgit sa pamilya sa biktima.
