GENERAL SANTOS CITY – Blangko pa ang kapulisan sa Tupi, South Cotabato sa motibo ug ilhanan sa suspek sa lain na usab nga pagpamusil-patay nga natigayon sa ilang area of responsibility.
Kahinumdman nga laing tribal leader na usab ang biktima nga giilang si Danny Buan, 56 anyos, residente sa Brgy Palian, Tupi.
Nasayran nga ang nasampit nga biktima ang uyuan sa laing tribal leader nga usa usab ka barangay tanod nga si Domingo Malida Jr. nga gipusil-patay miaging semana samtang anaa sa bilyaran sa nasampit nga lugar.
Sa pakighinabi sa Bombo Radyo kang Police Inspector Jun Delco, hepe sa Tupi Municipal Police Station, samtang nangape si Buan alas-8:30 kagahapon sa buntag, kalit na lamang miabot ang wala mailhing suspek nga naka-bonnet ug gipusil ang biktima gamit ang wala matinong armas.
Gikabutyag nga nag-inusara lamang ang suspek. Duha ka igo ang naangkon sa suspek sa kilid sa iyang tiyan partikular sa wala nga bahin, usa sa pikas, ug usa sa tunga mismo sa tiyan, kung asa nadala matud pa kini sa balay-tambalanan apan gideklarang dead on arrival.
Kahibaluan nga blangko pa usab ang kapulisan sa motibo ug ilhanan sa suspek sa pagpamusil-patay sa pag-umangkon niini, kung asa pulos nagbutyag ang ilang mga pamilya nga wala matud pa silay nasayran nga nakabangi sa mga biktima.
Hinuon, gituuhang posibleng usa lamang ang suspek, apan giberipika pa kini sa kapulisan, samtang padayon sila sa pagpangalap ug dugang impormasyon.
