GENERAL SANTOS CITY – Nangalap pa og dugang impormasyon ang kapulisan kalabotan sa pagpamusil sa motorcycle riding criminals sa usa ka traysikel driver sa National Highway Prk. Puting Bato Brgy. Calumpang ning syudad.
Matud pa ni P/Major Richard Ybañes, hepe sa Tambler Police Station nakiglambigit na ang imbestigador sa ilang presinto ngadto sa biktimang si Alnan Jamarel Haway, 18 anyos nga residente sa Prk Pandian, Labangal nga nagpaalim pa sa tambalanan tungod sa naangkong samad pinusilan sa lawas.
Kini aron mapangutana ang nasampit kung kinsa ang gidudahan niining mipusil kaniya og unsa ang motibo.
Ang biktima nagmaneho sa traysikel kauban ang mga paryenti paingon sa Calumpang apan pag-abot sa tulay sa Prk. Puting Bato gipusil sa wala mailhing lalaki nga nakamotorsiklo kulay blue nga may backride.
Naigo sa lawas ang biktima hinungdan nga gilayong gidala sa labing duol nga ospital sa Calumpang .
Narekober sa crime scene ang lima ka basiyo sa caliber 38 pistol nga gituohang gigamit sa mga suspek sa pagpusil sa biktima.
