GENERAL SANTOS CITY – Nagpabiling nagpaalim sa ospital dinhi sa dakbayan ang usa ka traysikel driver nga naipit sa iyang traysikel human nga natumbahan ug duha ka punuan sa lubi.
Giila ang nasampit nga si Cris Manansala, residente sa Blk 2 Lot 7, Phase 2, GenSanville Subd, Brgy. Bula ning syudad.
Sa pakighinabi sa Purok official sa lugar, gibutyag niiini nga anaa sila sa gawas dihang kalit nga natumba ang taas nga lubi ug nabunal sa laing punu-an hinungdan nga duha ka punuan gayud ang natumba sa traysikel nga tayming nga miagi sa lugar pasado ala una kagahapon sa hapon.
Gikabutyag nga gisubay ni Manansala ang dalan pauli sa ilang balay dihang nahitabo ang insidente.
Dakong samad sa agtang ang naangkon niini ug bali matud pa ang kamut human malugpitan ang traysikel niini sa lubi.
Gikanayong natumba ang punuan sa lubi tungod sa paghumok sa yuta human ang sunod-sunod nga pag-ulan sa mga miaging adlaw.
