GENERAL SANTOS CITY – Bistado nga wala diay business permit ang usa ka travel agency human gireklamo nga nagbaligya ug mga peke nga ticket sa eroplano.
Kini human midangop sa buhatan ni Geraldine Zamora sa Business Permits and Licensing Division ang mukabat sa 31 ka nahimong biktima sa Janette Travel and Tours.
Gabaligya matud pa kini ug ticket sa eroplano pinaagi sa internet. Matud sa usa sa mga reklamante nga si Amy Lapaz, nakurat na lamang sila dihang mubiyahe na unta, apan nadiskubrehan nga peke diay ug wala nakapangalan sa iya ang napalit nga ticket sa eroplano.
Hinungdan nga gilayong miaksyon ang buahtan ug mismong si Zamora ang nanguna sa pag-adto sa nahisgutang travel agency nga nahimutang sa Roxas St sa Brgy Dadiangas South.
Didto nabisto nga wala diay business permit ang naasoy’ng travel agency, luyo nga May 2017 pa nagsugod ug operate.
Hinungdan nga gituuhang nagpresenta ug lain nga business permit ang maong establisyimento, gumikan nakalusot.
Samtang, kalabot sa pagbaligya ug peke nga ticket, gitugyan na ni Zamora ang maong hisgutanan sa laing concerned government agency.
