Usa ka train enthusiast sa China ang nakapadugang sa kasaysayan human makatala og world record sa pagsakay og tren sulod sa halos 6,000 kilometro sa sulod lamang sa 24 ka oras, hinungdan sa iyang pagkadaug sa Guinness World Record para sa “Greatest distance travelled by train in 24 hours.”
Si Wang Dong, nga nailhan sa online nga “Transfer Emperor,” mipahigayon sa iyang biyahe gikan sa Shenzhen paingon sa Yibin niadtong Pebrero 15, 2025. Ang iyang ruta miagi sa dagkong siyudad sama sa Beijing, Shanghai, Zhengzhou, ug Guiyang, nga nakab-ot ang kinatibuk-ang gilay-on nga 5,887.76 kilometro.
Dili sayon ang iyang panaw tungod kay kinahanglan niyang andamon pag-ayo ang ruta ug kondisyon sa iyang lawas. Human mapakyas sa unang attempt niadtong 2024 tungod sa bagyo, misulay siya pag-usab karong tuiga uban sa mas hugot nga preparasyon, lakip na ang pagpaubos sa timbang aron mapalig-on ang iyang resistensya.
Usa sa labing kritikal nga bahin sa iyang panaw mao ang daliang pagbalhin sa tren line sa Beijing diin adunay siya’y 31 minutos nga oras lamang aron makalabang sa laing estasyon.
Bisan pa sa mga kalisdanan, malampuson niyang nahuman ang biyahe nga adunay nabiling 40 segundos sa wala pa matapos ang gitudlong 24 ka oras. Para kang Wang Dong, dili lang kini usa ka record apan usa ka espesyal nga paagi sa pagpangpasidungog sa iyang pagkahilig sa mga tren nga nagsugod pa sukad siya bata pa.
Karon, plano niya nga mulakaw pag-usab gamit ang mas hinay nga tren aron mas malingaw siya sa tan-awon ug kasinatian sa biyahe.
