GENERAL SANTOS CITY – Ulahi na ang pagmahay sa usa ka lady pusher nga namroblema karon kung unsa ang mamahimong kahimtang sa pamilya human madakpan sa gipahigayong buy-bust operation sa kapulisan sa Highway Corner Prk. KPS, Labangal ning dakbayan.
Kahinumduman nga malinawong miuban sa mga salop sa Makar Police Station ug Philippine Drug Enforcement Agency (PDEA) ang nagpangalan ug Jenefer Chavez, 32-anyos nga taga Purok San Roque Labangal ning siyudad dihang gidakop sa kapulisan.
Kini human nga mitunol ug usa ka putos sa gituohang shabu sa kantidad nga P500 ngadto sa nagpakaaron-ingnon nga poseur buyer.
Usa ka pakete sa gidudahang shabu ang nakuha gikan sa suspek nga nanarbaho sa Fishport.
Kasong paglapas sa Section 5 kon pagbaligya ug droga ilawom sa RA 9165 kon Comprehensive Dangerous Drugs Act of 2002 ang atubangon sa dinakpan nga nasayran nga breadwinner sa pamilya.
Samtang galaum ang kapulisan nga mahimong yawe ang dinakpan aron masayran kung kinsa ang mga anaa sa Fishport nga kaubanan niini sa pagbaligya ug droga lakip mga pusher.
