Hugot nga gipanghimakak ni Metropolitan Manila Development Authority (MMDA) General Manager ug kanhi PNP Chief Nicolas Torre III ang mga migawas nga balita nga modagan siya isip mayor sa Davao City.
Gipasabot ni Torre nga nagsugod lamang ang tanan sa usa ka komento sa usa ka netizen sa social media. Tungod niini, paspas kining mikaylap ug nahimong daw tinuod nga balita ang maong istorya.
Matud niya, nakatutok siya karon sa iyang katungdanan isip labaw sa MMDA ug gipasiugda nga ang pagserbisyo sa publiko dili kinahanglan hulaton pa ang panahon sa eleksiyon.
Sa miaging mga interbyu, gipahayag usab ni Torre nga wala siyay igo nga pondo o pinansyal nga kapasidad aron mosulod sa politika.
Nahimo siyang sentro sa atensyon sa Davao City human niya kuwestyunon ang bilyon-bilyong pondo alang sa flood control projects sa siyudad, ilabina human maapektuhan sa baha ang iyang kaugalingong balay.
Tungod niini, adunay mga grupo ug netizens nga nagdasig kaniya nga mohagit sa pamilyang Duterte sa lokal nga eleksiyon.
Gipahayag usab ni Vice President Sara Duterte nga gawasnon ug welcome ang bisan kinsa, lakip si Torre, nga modagan sa ilang balwarte. Apan, pormal nang gitapos ni Torre ang mga espekulasyon pinaagi sa iyang opisyal nga pagdumili sa maong isyu.
