GENERAL SANTOS CITY – Giangkon ni Atty Camille Remoroza, ang top three topnotcher sa 2017 Bar Examination nga graduate sa Ateneo De Davao University, nga hilabihan ang iyang gibati nga stress dihang nagpaabot pa sa resulta sa 2017 Bar Examinations.
Ug gani, kaniadtong tungura nga migawas ang resulta, atua matud pa siya sa usa ka resort aron mag-unwind ug magpatangtang ug stress, human nga pilla ka gabii na’ng walay tarong nga tulog.
Dungan niini, giangkon usab ni Remoroza kansa gihimugso ug nagdako sa Davao City, nga usa usab ka nursing graduate, nga wala niya damha nga mahimong top three topnotcher sa 2017 Bar Examination.
Sa pakighinabi sa Bombo Radyo, gisaysay ni Atty Camille kon unsa kalisod ang kasinatian isip law student, kung asa hilabihang kadaghan ang kinahanglang basahon, hangtod sa pagreview alang sa bar exam.
Gawas niini, nakasinati usab matud pa siya ug bagsak nga grado samtang anaa sa law school. Apan hugot gayud ang iyang determinasyon, ug gibati matud pa niya nga mao kadto ang iyang calling, hinungdan nga naningkamot, hilabi na nga “childhood dream” niya ang mahimong abogado.
Samtang, gipasalig ni Atty Camille Remoroza, nga sa gobyerno niya ihatag ang iyang serbisyo, human nga nakapasa isip top 3 sa 2017 Bar Examination.
Sumala pa nga bisan sa iyang interview, mao kadto iyang gibutyag, nga mao iyang passion, ug gisaad sa iyang kaugalingon nga sa gobyerno gayud magserbisyo, kon mahimong abogado.
Kahibaluan nga sa kasamtangang, gatrabaho si Atty Remoroza sa Office of the Ombudsman-Mindanao.
Hinungdan nga galaum siya nga ma-absorb ug dinhi na padayon nga magtrabaho.
Dungan niini, pinaagi sa Bombo Radyo, gipasalamatan ni Atty Remoroza ang tanang mga misuporta kaniya, labaw na ang Diyos, gumikan sangko sa langit ang gibati nga kalipay sa nakab-ot niya nga kalampusan.
