Minyo na kuno ang mag-uyab nga Tom Holland ug Zendaya sumala sa ilang stylist nga si Law Roach, kinsa mitug-an sa usa ka interbyu atol sa 2026 Actor Awards niadtong Marso 1(US Time) nga nahitabo na ang kasal ug giingong tinuod gayud kini.
Dali usab mitubag ang mga fans sa social media aron ipadayag ang ilang kalipay ug pagtimbaya sa magtiayon.
Niadtong Enero 2025, una nang gitaho nga engaged na ang duha, samtang gibutyag sa TMZ nga romantiko ug pribado ang proposal nga gihimo ni Holland atol sa holiday trip uban sa pamilya ni Zendaya sa Estados Unidos.
Nagsugod ang espekulasyon sa engagement sa dihang namatikdan sa fans ang diamond ring nga gisul-ob ni Zendaya sa 2025 Golden Globes, ug sa miaging interbyu sa Men’s Health, gipadayag ni Holland nga plano niyang mohawa sa pag-arte kon magsugod na sila og pamilya.
Ang duha unang nagkatrabaho sa pelikulang Spider-Man: Homecoming niadtong 2016 ug opisyal nga gikumpirma ang ilang relasyon niadtong 2021 human makita nga naghalok sulod sa sakyanan, samtang sa laing interbyu, gipasiugda ni Zendaya ang ilang tinguha nga magpabiling pribado ang pipila ka aspeto sa ilang relasyon.
