Gipagawas sa Senado ang timetable sa oras nga igugol sa impeachment court, panahon sa pagsugod sa husay sa reklamo batok kang Bise Presidente Sara Duterte.
Kini gipapirmahan ni Senate President Francis “Chiz” Escudero ang Special Order No. 2025-15 (OSP) alang sa pag-umol og administrative support group nga moabag sa Senado kon mahimo nang impeachment court sa impeachment trial sa Bise Presidente.
Sa proposed impeachment calendar, sa pagbalik sa session karong Hunyo 2, ang mga prosecutors mosumiter sa Articles of Impeachment ug aprobahan usab ang revised rules of procedure sa impeachment trial.
Karong Hunyo 3, mag-convene ang Senado isip impeachment court ug manumpa na ang mga incumbent senator judges.
Sa Hunyo 4, ipagawas ang summon ngadto kang Duterte, ug gikan sa Hunyo 14 hangtod Hunyo 24, makadawat na og mga pleading ug tubag ang kampo sa Bise Presidente.
Ang pre-trial itakda sa Hunyo 24-25. Samtang, sa pagbukas sa unang regular session sa 20th Congress, dungan sa State of the Nation Address (SONA) ni Presidente Ferdinand Marcos Jr. 12 ka bag-ong senador ang mosulod.
Karong Hulyo 29, manumpa na ang mga bag-ong napiling senador nga molingkod isip huwes sa impeachment trial ni Duterte.
Sa samang adlaw, ang pagsulay magsugod gikan sa alas-9 sa buntag hangtod sa alas-2 sa hapon aron mahatagan og dalan ang tibuok sesyon sa alas-3 sa hapon.
Matud pa ni Escudero, target sa impeachment court nga masugdan ang aktuwal nga husay batok kang VP Sara karong Hulyo 30.
