Usa ka talagsaon nga istorya nahimong hilisgutan sa panag-istoryahanay sa Mayo 5, sa dihang ang usa ka tawo gikan sa Tokyo, Japan migamit og tiket alang sa World Expo nga gikanselar tungod sa gubat, 85 ka tuig na ang milabay.
Si Fumiya Takenawa, 25, misulod sa Expo 2025 sa Osaka gamit ang orihinal nga tiket para sa “2600 Japan International Exposition,” usa ka world expo nga ipahigayon unta sa Tokyo niadtong 1940.
Gikansela ang expo tungod sa World War II, hinungdan nga gitawag kini nga “phantom expo”.
Si Takenawa usa ka kolektor sa mga memorabilia gikan sa mga daan nga expo, ug usa sa iyang mga paborito mao ang iconic nga “Tower of the Sun” gikan sa Expo ’70 sa Osaka.
Niadtong Marso, samtang nagpahayahay sa ilang balay sa Osaka Prefecture, nakakita siya og tinuod nga tiket para sa 1940 expo nga ibaligya online. Isip usa ka collector, una niya kining gigamit nga display sa iyang panimalay, hangtod nga nakahukom siya nga magpakisayod sa mga organizer sa Expo 2025 kon magamit ba ang karaang tiket.
Sa iyang katingala, gitugotan siya sa paggamit niini. Miadto dayon siya sa expo grounds ug mibisita sa mga pavilion sa Czech Republic ug Saudi Arabia.
Matud pa niya, “Kini ang labing una nga expo nga akong natambongan, ug gibati nako nga nahimo na akong bahin sa kasaysayan. Ang mga expo nga sama niini usa ka pahinumdom sa panaghiusa.
Pinaagi sa paggamit niining karaang tiket, ingon og natuman sa orihinal nga tag-iya niini nga tiket ang iyang damgo nga makatambong sa usa ka expo.
Sa 1938, gibanabana nga usa ka milyon nga mga libro sa tiket ang gibaligya alang sa kung unsa unta ang 1940 expo.
Ang matag booklet adunay 12 ka mga tiket ug nagkantidad lang og 10 yen, nga katumbas sa gibana-bana nga 17,000 yen (P6,400 karon).
Sa kasaysayan, liboan ka daan nga mga tiket gikan sa 1940s ang gigamit sa Expo ’70 sa Osaka, ug dul-an sa 100 ka mga tiket ang gigamit sa Aichi Expo niadtong 2005.
