GENERAL SANTOS CITY – Tibuok kinabuhi nga pagkabilanggo. Kini ang buot mahitabo ni Kag. Lourdes Casabuena kang John Eliser Caban, nga gitudlong suspek sa pipila ka pagpamusil-patay dinhi sa siyudad.
Sa pakighinabi sa Bombo Radyo, gihingusgan sa nasampit nga opisyal nga isip usa ka self-confessed killer, dili na angayan pang pagawason sa bilangguan si Caban.
Kini gumikan daw sa wala matud pay Diyos ang nasampit nga suspek, human 13 ka higayon nga nakapatay, hinungdan nga angayang sa bilangguan madugta.
Kahibaluan nga gipresenta sa kapulisan kaniadtong Dominggo si Caban nga usa matud pa ka professional gun for hire, ug kasamtangang nakabilanggo sa Lanton City Jail, human nasikop gumikan sa giatubang nga 13 ka ihap sa kasong murder ug usa ka frustrated murder.
Siya ang gitudlong responsable sa pipila ka kaso sa pagpamusil-patay sa siyudad, apil na sa pulis nga si PO1 Glen Alicarte.
Dugang pa ni Kag. Casabuena, sa karon kinahanglang masayran kon kinsa ang nagsugo ug nagbayad kang Caban aron himuon ang pagpatay.
