Thailand, magpatuman og mas hugot nga balaod sa armas human sa pagpamusil nga mipatay og walo
Nisaad si Thailand Prime Minister Anutin Charnvirakul nga magpatuman og mas hugot nga balaod bahin sa armas human sa pagpamusil nga gihimo sa usa ka 14-anyos nga estudyante sa Nonthaburi nga mikalas sa kinabuhi sa walo ka tawo ug nakapasamdan sa 22 pa.
Una nga gipatay sa tin-edyer ang iyang mga apohan sa wala pa siya miadto sa Debsirin School, diin iyang gipusil ang lima ka magtutudlo ug sa ulahi mipatay sa iyang kaugalingon.
Matud sa kapolisan, ang armas ug mga bala nga gigamit sa pagpamusil iya sa iyang apohan ug legal nga narehistro.
Matud sa punong ministro, ang bag-ong balaod maglimitar sa pagdala og armas sa publiko ug ang mga opisyal lamang sa gobyerno nga anaa sa katungdanan ang tugotan nga magdala niini.
Ang insidente nagpasiugda pag-usab sa taas nga gidaghanon sa mga sibilyan nga adunay armas sa Thailand, nga gibanabanang mokabat sa 10.3 milyon, lakip na ang upat ka milyon nga ilegal.
Padayon usab ang imbestigasyon sa mga otoridad aron matino ang uban pang detalye kalabot sa makalilisang nga pagpamusil.
