GENERAL SANTOS CITY -Angayang na-monitor ug nasayod ang mga ginikanan sa mga kalihukan sa ilang anak, hilabi na sa mga teenagers.
Kini ang gibutyag ni Dr. Mely Lastimoso sa City Health Office, may kalabutan sa taho nga pagsaka sa natala nga teenage pregnancy sa GenSan, nga matud pa anaa na sa pula nga score card, kon mas taas sa 10%.
Sumala pa nga angayang may panahon gayud ang mga ginikanan aron bantayan ug atimanon ang mga anak mismo sa panimalay.
Kini aron dili mahisalaag ang mga anak. Dugang pa ni Dr. Lastimoso, angayang dili gilayong pangkasuk-an ang mga bata inay mahimong “informed” ang mga ginikanan ug sayron ang henerasyon sa mga anak, sama sa mga millenials.
Kini aron ma-edukar ug magiyahan sila, ug malikayan nga malambigit ang mga kabataan sa sayong pakighilawas.
Hinungdan nga mas gipakusgan ug gipalapdan matud pa ang mga programa aron ma-edukar ug insakto ang mga kabataan may kalabutan sa sex education, aron likayan nilang malambigit niini nga mahimong magresulta sa sayong pagmabdos.
