Sarangani Province-Gilauman karon sa mga taga-Sarangani Province nga mudaghan pa ang mga kurso sa technical ug vocational nga i-offer sa TESDA human gipili si Congressman Steve Chiongbian Solon isip vice chairman sa Committee on Higher and Technical Education didto sa House of Representatives.
Sa talaan sa Sarangani Congressional Office, nikabat sa unom ka gatos (600) ka mga indibidwal ang naka-angkon og libreng TESDA NC II gikan July 2022 pagsugod paglingkod ni Congressman Solon isip kongresista hangtud May 2025, sulod sa unang termino niini pagka-congressman sa probinsya sa Sarangani.
Sila ang mga gitawag nga TESDA scholar ilalum sa kategorya nga technical education, kadtong nikuha og dressmaking, driving, carpentry, cookery, small engine servicing, ug daghan pa.
Gipanagaan na sila sa gobyerno og allowance matag usa para magamit sa pamelete ug pagkaon kada adlaw samtang ga-eskwela sa TESDA, gipanagaan pa sila kada usa og mahalon nga starter tool kits kon mga brand new nga himan ug kagamitan magamit inig sugod sa ilang panginabuhian.
Niagi lang semana, nag-open napud og laing batch sa mga estudyante nga mu-eskwela og baking ang sikat nga culinary school sa dakbayan sa Heneral Santos, ang Gerardo’s School of Culinary Arts, ubos sa pamunuan ni Congressman Solon.
Samtang, atong bulan sa Hunyo ning kasamtangang tuig 2025, nanawagan og bag-ong slots ang Sarangani Congressional Office para eskwelahan ang gitanyag niining shielded metal arc welding, bread and pastry, animal poultry production, tiles setting, ug electronics.
