GENSAN – Sa Sabado na mubiyahe ang Team Pacquiao gikan sa Los Angeles padulong sa Las Vegas.
Kini alang sa Pacquiao-Broner bout nga matigayon sa MGM Grand Garden Arena sa Las Vegas, Nevada sa Enero 20.
Taliwala sa mga ginaduso ug mga huhungihong nga si Floyd Mayweather Jr ang sunod niyang makaatbang, gihingusgan sa fighting senator nga nakatutok siya karon sa umaabot nga away kang Adrien Broner ug wala nay lain pa.
Sumala pa nga wala una niya ginahuna-huna ang may kalabutan kang Mayweather, ug kon ugaling may mga plano man nga rematch, ayha na lamang niya kini huna-hunaon human sa away karong Enero 20.
Samtang, gipanghimakak usab sa Team Pacquiao ang mga taho ug huhungihong nga matud pa na-overtrain ang Pinoy ring icon.
Kini human sa report nga nagka-injury si Pacquiao sa tunga-tunga sa pagbansay gumikan sa overtraining. Apan matud sa team, hugot ang ilang pag-amping ug wala na-overtrain ang fighting senator.
