GENERAL SANTOS CITY – Medyo gibag-o sa Team Pacquiao ang schedule sa pipila ka bahin sa training ni eight division world champion Manny Pacquiao, sa nahibiling adlaw niini dinhi sa siyudad una mubiyahe sa Brisbane, Australia sa Hunyo 24, adlaw’ng Sabado.
Kagahapon sa buntag, sukwahi sa naandan, wala nag-jogging ang fighting senator sa Acharon Sports Complex, inay midagan sa Maasim, Sarangani Province.
Ug gani, bisan si Aquiles Zonio nga tigpamaba ni Pacquiao ang miadto sports complex ug wala naabtan ang Pambansang Kamao.
Nasayran nga gikan sa kanhing MWF o Monday-Wednesday-Friday, gihimong TTh o Tuesday-Thursday sa Team Pacquiao ang pagdagan niini sa tungason nga dalan sa Maasim. Matud ni Zonio, buot tutukan ni Pacquiao sa nahibiling adlaw sa training camp niini sa dakbayan ang pagpabilin sa iyang kondisyon una mulupad sa Australia.
Samtang, kagahapon sa hapon, napulo ka rounds sa punch mitts ang gihimo ni Pacquiao kauban si Coach Freddie Roach sa iyang Wild Card Gym.
Karong adlawa unom ka rounds sa sparring session ang himuon ni Manny kauban gihapon ang mga spar mates.
Matud kang assistant trainer Buboy Fernandez, gamay na lamang ang ilang training gumikan ginalikayan nilang ma-burnout ang fighting senator, ug buot nga ipabilin na lamang ang 100 percent niini nga kondisyon.
