GENERAL SANTOS CITY – Walay usikon nga panahon ang Team Pacquiao kung asa gilayong magsugod ang sparring sessions ni eight division world champion ug Senador Manny Pacquiao, pag-abot sa Hunyo 1, isip kabahin sa pagpangandam sa umaabot nga engkwentro.
Sa pakighinabi sa Bombo Radyo kang Aquiles Zonio, tigpamaba ni Pacquiao, gibutyag sa nasampit nga gilaumang muabot na ang mga sparring partners una ang Hunyo 1, aron gilayon nang makasugod ang sparring sessions sa nahisgutang petsa. Sumala pa ni Zonio, may usa ka langyaw nga sparring partner si Pacquiao, apan wala pay gipagawas nga detalye ang senator kon kinsa.
Sa pamahayag niini, nakasabotan nilang Head coach Buboy Fernandez, Assistant Coach Dodong Donaire, ang amahan ni “Filipino Flash’ Nonito Donaire og Conditioning coach Justine Fortune nga dili dagko nga sparr mates ang ilang kuhaon karon dili sama kaniadto nga pulos mga dagko ang ginakuha ni Coach Freddie Roach.
Matud pa, mas maayong sama lamang ang gidak-on kang Lucas Matthysse ang sparr mates karon sa Pinoy ring icon.
Samtang, miapela si Zonio nga ipadayon lang sa publiko ang pagsuporta kang Senador Manny Pacquiao ilabina ang pag-ampo kaniya nga kanunay nga hatagan ug kalagsik og himsog nga panglawas aron magmalampuson sa pagkab-ot sa iyang tinguha nga mahimong world champion pag-usab.
Gibutyag ni Zonio nga ang umaabot nga engkwentro sa fighting senator kang Lucas Matthysse ang “very crucial’ tungod kini ang magdetermina kung kinahanglang magpadayon sa boxing o kinahanglang magpahulay na si Pacquiao.
Sa iyang pamahayag, dili lang pinaagi sa pagkugi sa training ug disiplina sa kaugalingon, nga mao ang ginahimo ni Manny sa pagsugod sa iyang training camp apan kinahanglan usab ug pag-ampo sa tanan ilabina na ang kaluwasan niini atul sa mismong engkwentro.
