Opisyal nang naminyo ang pop superstar nga si Taylor Swift ug ang American football player nga si Travis Kelce niadtong Biyernes sa gabii, Hulyo 3, 2026, sa usa ka luhoon nga seremonya sa Madison Square Garden sa New York City.
Ang ilang suod nga higala ug iladong komedyante nga si Adam Sandler ang nagsilbing officiator sa ilang kasal.
Bisan og nakadani og mga batikos ug reklamo gikan sa pipila ka mga residente ang mga pagpangandam alang sa maong kalihokan, malampuson gihapon nga nahuman ang gitawag nga “wedding of the century.”
Nakadawat usab og daghang batikos gikan sa publiko ug mga motorista ang kasal human gipasira ang mga dalan sa palibot sa Madison Square Garden.
Tungod niini, naapektuhan ang dagan sa trapiko sa Midtown Manhattan atol sa long weekend sa Fourth of July.
Tungod sa kapin sa 1,000 ka mga bantugang bisita, giputos sa dagkong mga kurtina ang palibot sa venue ug gipahimutangan og mga barikada ug mga checkpoint sa New York Police Department ang usa sa labing busy nga transit hub sa New York, nga nakapasuko sa daghang regular nga mga commuter.
Aduna usab mga netizens sa social media nga mibatikos sa sobra nga pagtagad sa media sa maong kasal, ug gitawag kini nga “usa ka dakong komedya,” samtang giingon nila nga daghan pa ang mas importante nga mga isyu sa kalibotan. Wala mosunod sa tradisyon ang bag-ong magtiayon.
Hinunoa, ang igsoon ni Taylor nga si Austin Swift ang nagsilbing Man of Honor, samtang ang igsoon ni Travis nga si Jason Kelce ang nahimong Best Man.
Pareho silang nagsul-ob og custom nga Christian Dior Haute Couture nga gidisenyo ni Jonathan Anderson, nga giparesan og custom nga sapatos sa Christian Louboutin.
Nagsul-ob usab si Taylor og alahas gikan sa Cartier. Human silang makasal, misiga dayon ang dagkong mga screen sa gawas sa Madison Square Garden ug ang Empire State Building sa kolor pink ug lavender, diin mibandera ang mensaheng “JUST&T MARRIED!” isip pagpahibalo sa ilang kasal sa tibuok siyudad.
