Nakasulod na ang powerhouse team nga Argentina sa quarterfinals sa FIFA World Cup 2026 human nila maluwas ang duwa batok sa Egypt sa Round of 16.
Sa dihang hapit na magtuo ang mga fans nga mahitabo ang dakong upset sa maong torneo, nakahimo ang defending champions og impresibong comeback pinaagi sa tulo ka late goals aron mapildi ang Egypt, 3-2.
Nahimo sa Argentina ang ilang comeback sulod lamang sa 13 minutos ug 15 segundos sa duwa.
Sa ika-15 minutos pa lang, nakapuntos na ang Egypt pinaagi kang Yasser Ibrahim nga maoy naghatag kanila og unang bentaha.
Dugang pa niini ang goal ni Mostafa Ziko sa ika-67 minuto sa duwa.
Bisan lisod gihapon ang dagan sa duwa alang sa kampo ni Lionel Scaloni sa pagsugod sa second half, misugod ang pagbalik sa Argentina pinaagi sa header ni Christian Romero sa ika-79 minuto.
Sa panahon nga labing gikinahanglan sa iyang team, nakapuntos usab ang 39-anyos nga captain nga si Lionel Messi sa ika-83 minuto aron maparehas ang iskor tali sa Egypt ug Argentina.
Naselyohan dayon ang kadaugan sa South American team sa ika-92 minuto o duha ka minuto sa stoppage time pinaagi sa header ni Enzo Fernandez.
Atubangon sa Argentina ang modaog sa duwa tali sa Switzerland ug Colombia sa Round of 16 nga ipahigayon alas-4:00 sa kaadlawon karong adlawa, Philippine Time. Kini ang kataposang duwa sa last 16.
Ikaduha na kini nga higayon sa knockout stage nga nasangit sa pagkaalanganin ang Argentina apan nakalahutay gihapon.
Sa Round of 32, nahinumdoman nga nakaabot usab sa extra time ang ilang duwa batok sa debutant nga Cabo Verde, apan nakadaog gihapon sila, 3-2.
Ang goal ni Messi batok sa Egypt mao ang iyang ikawalong goal sa 2026 World Cup, nga mao ang pinakataas nga gidaghanon sa goals sa torneo. Gisundan siya nila Kylian Mbappe ug Erling Haaland nga parehong adunay pito ka goals.
