GENERAL SANTOS CITY – Gilayong nag-organisa og task force ang dakbayan human gikumpirma sa Department of Health(DoH) nga may natala nang kumpirmadong kaso sa 2019 Novel CoronaVirus (N-CoV) sa nasud human nga usa ka 38-anyos nga babaye gikan Wuhan City, China ang nagpositibo sa maong sakit.
Matud pa ni Dr. Jet Oco, City Health Officer nga gipulong ang Local Health Board kauban ang Civil Aviation Authority of the Philippines(CAAP) GenSan, Bureau of Quarantine og uban pang ahensiya og gihisgutan ang mga lakang nga himuon.
Gibutyag ni Dr. Oco nga gisiguro sa Bureau of Quarantine nga dili basta-basta makasulod ang virus gikan sa China bisan pa walay thermal scanner ang GenSan Airport.
Gihisgutan usab ang posebling pag-angkon sa nasampit nga scanner pinaagi sa tabang sa mga lawmakers.
Gipanghimakak ni Dr. Oco ang nanggawas nga report sa online nga may person under investigation nga naka-confine sa usa ka pribadong ospital sa syudad.
Sa iyang pamahayag, angayang ipabilin ang limpyo nga panglawas og anaron ang kaugalingon nga kanunay nga manghugas sa mga kamot. Samtang kun mangatsing angayang mugamit og panyo aron dili makatakod og sakit sa uban.
