GENERAL SANTOS CITY – Patay ang subject sa search warrant operation human matud pa misukol sa kapulisan. May kalabutan kini sa pagsupak sa RA 9165 kon Comprehensive Dangerous Drugs Act of 2002.
Natigayon ang naasoy’ng operasyon alas-12:20 sa kaadlawon sa Gensanville Subdivision, Bula ning siyudad, partikular sa balay sa target nga giilang si Jason Jamson alyas Jason Burn, hamtong ang pangidaron, pinaagi sa hiniusang unit sa kapulisan sa siyudad.
Sa inisyal nga report, pag-abot sa kapulisan miaksyon matud pag sukol ang suspek ug nagpabuto ug pusil sa mga otoridad.
Mibalos matud pa ang kapulisan ug nakaangkon ug gamay’ng binayluay ug bala. Nakaangkon ug multiple gunshot wounds si Jamson hinungdan nga gidala sa balay-tambalanan apan gideklarang dead on arrival.
Samtang nakuha sa lugar ang mga armas sama sa duha ka caliber 45 pistol ug upat ka 9mm pistol.
Narekober usab ang unom ka sachet sa gituohang shabu nga may estimated market value nga P140,000; mga drug paraphernalia, ug cash nga P90,000.
Apan sa pakighinabi sa Bombo Radyo, hugtanong gipanghimakak sa inahan sa suspek ang alegasyon sa kapulisan ug gihingusgan nga giplanteran lamang sa kapulisan ug mga ebidensya ang iyang anak.
Kini luyo nga giangkon nga gagamitan ang anak kaniadtong mas batan-on pa. Wala usab matud pay dala nga search warrant ang kapulisan dihang gihimo ang operasyon, base sa alegasyon sa pamilya sa suspek.
Samtang, gipaabot pa ang mamahimong pahayag sa kapulisan kalabot sa insidente.
