GENERAL SANTOS CITY – Patay ang target sa gipahigayon nga buy-bust operation sa Polomolok Municipal Police Station, alas-6:00 kagabii sa kapinyahan sa Prk Makisama-B Upper Matin-aw, Silway 8, Polomolok.
Kini human matud pa misukol ang nagpangalan ug Ismael Aminola, hamtong ang pangidaron, human namatikdan nga mga kapulisan ang iyang katransaksyon.
Mibunlot matud pa ug caliber 38 revolver nga pusil ang suspek ug nagpabuto sa mga otoridad, hinungdan nga gipusil usab sa mga pulis.
Hinuon, wala matud pay nasamdan sa bahin sa kapulisan, samtang nadala pa sa balay-tambalanan ang suspek, apan gideklarang dead on arrival sa mga doktor.
Matud ni Silway 8 Kapitan Nilo Gumbao, personal niyang kaila ang suspek, apan wala nasayod kon may kalambigitan sa iligal nga droga ang nahisgutan.
Samtang, matud ni Police Chief Inspector Alex Orcajada, hepe sa nasampit nga presinto, base sa ilang record, nailhan nga tigpayuhot ug droga ang nasampit nga suspek.
Nahimo usab matud pa kining lookout kaniadto sa pipila ka mga pagpamusil sa Polomolok.
Padayong giimbestigahan sa kapulisan ang nasampit nga suspek.
