Gidili sa Taliban sa Afghanistan ang mga libro nga gisulat sa mga babaye gikan sa mga pampublikong unibersidad, ingon man ang pagtudlo sa tawhanong katungod ug sekswal nga harasment.
Sumala sa taho, labaw pa sa 140 ka mga libro nga gisulat sa mga babaye – lakip ang “Safety in the Chemical Laboratory” – usa sa 680 nga mga libro nga giisip sa Taliban nga supak sa ilang mga pagtulon-an sa Sharia ug mga palisiya sa nasud.
Dugang pa, 18 ka mga kurso ang dili na tugotan nga itudlo sa mga unibersidad.
Unom kanila espesipikong nakiglabot sa mga babaye, sama sa Gender and Development, The Role of Women in Communication, ug Women’s Sociology.
Sumala sa Taliban, kini nga mga kurso supak sa mga prinsipyo sa Sharia ug sa sistema sa politika.
Kabahin kini sa serye sa mga pagdili nga gipahamtang sa Taliban sukad sila mibalik sa gahum upat ka tuig na ang milabay.
Pipila lang ka adlaw ang milabay, gidili usab sa gobyerno sa Taliban ang paggamit sa fiber-optic nga internet sa labing menos 10 ka mga probinsya, aron kuno mapugngan ang “imoralidad.”
Gisirad-an usab ang mga kurso sa Midwifery sukad niadtong 2024.
Hangtod karon, gidid-an gihapon sila sa pagtuon lapas sa Grade 6. Sa sinugdan gidepensahan sa Taliban ang ilang mga palisiya pinaagi sa pag-ingon nga ilang gitahod ang mga katungod sa kababayen-an sumala sa ilang interpretasyon sa kultura sa Afghanistan ug balaod sa Islam, apan nagpadayon sila sa pag-atubang sa pagsaway gikan sa lokal ug internasyonal nga komunidad alang sa kaylap nga diskriminasyon ug ang pag-us-os sa mga katungod sa kababayen-an.
