GENERAL SANTOS CITY – Gipatawag na sa kapulisan ang tag-iya sa trak de karga nga misungag sa usa ka tindahan nga mikutlo sa kinabuhi sa usa ka tindera ug sa mismong driver .
Matud ni Lt. Col. Edgar Yago, hepe sa Malungon Municipal Police Station nga gipatawag ang ginikanan ni Angelica Gabay Dandan 21 anyos nga residente sa sitio cambudlot, Lutay Malungon ug ang tag-iya sa tindahan ug ang operator sa 10 wheeler truck aron patubagon sa nahimo nga danyos.
Kahinumduman miaging gabii kalit gidaro sa 10-wheeler truck ang usa ka tindahan sa Malungon public market alas 10 sa gabii hinungdan nga naipit ang biktima nga usa ka estudyante.
Nawad-an matud pa ug giya ang sakyanan nga maneho ni Arnel Pabrigar nga taga Isulan Sultan Kudarat hinungdan nga giliko ug misuong sa tindahan.
Matud ni Yago nga namatay ang driver tungod sa dagkong samad nga naangkon samtang grabe ang helper nga si Arnel Calunsag nga miambak gumikan sa panghitabo.
Padulong unta sa Davao ang sakyanan apan nawad-an ug brake nga nagresulta sa insidente.
Gani nadugayan ug kuha sa biktima nga estudyante nga gituhu-an nga nakuryente human midat-og ang sakyanan nga adunay karga nga 550 ka sako sa feeds.
