GENSAN- Gipasiugda ni Atty. Barry Quimno, usa ka miyembro sa kapulisan sa General Santos City Police Office, nga dako ang responsibilidad sa mga pulis sa pag-atiman ug pagseguro sa ilang service firearm tungod kay kini giisip nga usa sa labing sensitibong kagamitan sa ilang trabaho.
Matod kaniya, gikinahanglan nga magpakita ang mga kapulisan og “extraordinary diligence” sa pagpanalipod sa ilang mga armas tungod kay ang pagkawala niini mahimong mosangpot sa kadaot o kamatayon sa mga sibilyan kon mahulog kini sa mga kamot sa mga kriminal.
Sumala pa ni Quimno, kabahin sa protocol sa Philippine National Police ang kanunay nga pagseguro sa ilang service firearm. Dili kini mahimong pasagdan o ibutang bisan asa, ug kinahanglan nga pirmeng dala sa tag-iya. Kon biyaan man kini sa panimalay, kinahanglan nga nakakandado ug gitago sa luwas nga lugar nga dili maabot sa mga bata.
Ang pahayag ni Quimno may kalabutan sa nahitabong pagpamusil sa usa ka tulunghaan sa Tacloban City diin nalambigit ang duha ka menor de edad nga suspek. Sa imbestigasyon, nahibal-an nga usa sa mga armas nga gigamit adunay marka nga “PNP Property.”
Dugang pa niya, posible nga adunay legal nga pagpanubag ang tag-iya sa maong armas kon mapamatud-an nga adunay kakulang sa pag-atiman ug pagseguro niini nga maoy hinungdan sa paggamit niini sa maong krimen.
