GENERAL SANTOS CITY – Nagpabiling anaa sa red alert status ang mga otoridad sa Tacurong ug tibuok probinsya sa Sultan Kudarat, human sa natigayong sunud-sunod nga pagpabusikad sa improvised explosive device (IED) nga gikaangol sa 16 ka biktima.
Sa pagkakaron, nagpadayon ang pagsusi sa matang sa mga IED nga mibuto miaging gabii sa usa ka convenience store ug gasoline station sa national highway, Brgy. Poblacion, Tacurong City.
Nasayran nga cellphone ang gigamit nga triggering device sa pagpabusikad sa mga eksplosibo.
Kahinumduman nga kasamtangang anaa sa kustodiya sa mga otoridad ang duha ka suspek nga giilang sila si Warren ug Johari Gane nga matud ni Sultan Kudarat Provincial Director Senior Supt. Raul Supiter, nakit-an ang duruha sa blast site ug nakarekober ang mga otoriidad sa ilang posisyon ug granada.
Kahibaluan nga nagpaila ang mga suspek nga miyembro sa MNLF kon Moro National Liberation Front. Gituuhang extortion ang usa sa mga motibo sa gihimong pagpabusikad.
Sa pagkakaron padayong giimbestigahan sa mga otoridad ang naasoy’ng insidente.
