Girekomendar sa National Bureau of Investigation (NBI) ngadto sa Department of Justice (DOJ) ang pagpasaka og mga kasong kriminal batok sa kanhi head coach sa Ateneo Men’s Basketball Team nga si Tab Baldwin ug 11 pa ka tawo kalabot sa kamatayon sa duha ka estudyanteng-atleta nga sila si Rene Clert Baterbonia ug Divine Adili atol sa usa ka team-building activity sa Dipaculao, Aurora.
Si Baldwin ug unom pa ka tawo nag-atubang og mga kasong reckless imprudence resulting in two counts of homicide tungod sa kamatayon nila ni Rene Baterbonia ug Divine Adili.
Samtang, ang simple negligence resulting in two counts of homicide ang girekomendar batok kang Ateneo Athletics Director Emmanuel Fernandez ug tulo ka opisyal sa resort diin gipahigayon ang team-building activity.
Atol sa imbestigasyon, ang NBI mikuha og mga pamahayag gikan sa pipila ka mga opisyal sa Ateneo, lakip na si Ateneo President Roberto “Bobby” Yap, SJ, Baldwin, ubang mga coach, kasamtangan ug kanhing mga magduduwa, coaching staff, utility personnel, ug resort management.
Niining bahina, gi-refer usab sa NBI sa Department of the Interior and Local Government (DILG) ang posibleng pagpasaka og administratibong reklamo batok sa pipila ka mga opisyal sa munisipyo sa Dipaculao, Aurora, lakip na ang mga opisyal sa Business Permit and Licensing Office, Municipal Tourism and Cultural Development Office, ug Municipal Disaster Risk Reduction and Management Office.
