Posible nga mag atubang og contempt proceedings ang mi-resign nga coach sa Ateneo men’s basketball nga si Tab Baldwin kon dili siya motambong sa Criminal Investigation and Detection Group (CIDG) karong adlawa.
Gipahimangnoan kini ni DILG Secretary Jonvic Remulla samtang nagpadayon ang imbestigasyon sa kamatayon sa duha ka estudyante-atleta nga nalumos atol sa usa ka team-building activity sa Aurora.
Sumala ni Remulla, kini ang ikaduhang notice nga gipadala kang Baldwin, busa posible siyang mag-atubang og contempt proceedings kon dili siya motambong sa gikatakdang hearing.
Ang ubang mga miyembro sa coaching staff gikatakda usab nga motambong sa mga imbestigador karong Biyernes isip kabahin sa fact-finding investigation sa CIDG.
Dugang pa sa kalihim nga kon makompleto na ang mga pahayag sa mga coach, andam na sila sa paghatag sa ilang mga rekomendasyon.
Bisan pa, si Remulla miingon nga wala pa matino sa mga imbestigador kon kinsa ang posibleng responsable sa insidente.
Ang CIDG gilauman nga mosumite sa kompletong report niini sa Department of Justice sa sunod semana alang sa pagrepaso ug posible nga pagpasaka og angay nga mga kaso.
