Wala’y gipaabot nga pagtaas sa presyo sa sardinas karong panahona, sumala sa Department of Trade and Industry (DTI), bisan pa sa gipangayo sa mga tiggama nga usbaw ang gisugyot nga suggested retail price
Kini maoy tubag ni DTI Secretary Cristina Roque sa pangutana sa media human sa pagsusi sa mga school supplies sa Divisoria karong Domingo, Hunyo 15.
Sa interbyu si Canned Sardines Association of the Philippines (CSAP) executive director Francisco Buencamino nikompirmar nga nangayo sila og P3 nga usbaw sa SRP sa sardinas — gikan sa P21 ngadto sa P24 — tungod sa pagsaka sa presyo sa imported nga mga lata tungod sa paghuyang sa peso batok sa dolyar.
Matod niini, kon dili maaprobahan ang pagsaka sa presyo, posibleng mokunhod ang gidaghanon sa mga tatak nga makit-an sa lebel sa SRP.
Hinuon gipasalig sa DTI nga wala’y pagsaka sa presyo sa pagkakaron ug gikatakdang makigtagbo sila sa mga tiggama og de lata nga sardinas sunod semana aron tukion ang gisugyot nga pagsaka sa presyo.
