Mangandam na ang mga biyahero nga mulupad sa sulod ug sa gawas sa nasud karong Abril tungod sa gilaumang pagsaka sa pamasahe sa eroplano.
Kini human gipataas sa Civil Aeronautics Board (CAB) ang passenger fuel surcharge ngadto sa Level 8 gikan sa Level 4 niadtong Marso.
Sumala sa CAB, ang bag-ong surcharge level ipatuman sa unang katunga sa Abril ubos sa mubo nga 15 ka adlaw nga cycle.
Ang tumong mao ang mas paspas nga pagsunod sa nag-usab-usab nga presyo sa gasolina sa global nga merkado.
Sa advisory niini niadtong Marso 16, gipasabot sa ahensya nga ang mas mubo nga cycle makatabang sa pagpakunhod sa kalainan tali sa aktuwal nga gasto sa gasolina ug sa surcharge nga gipahamtang sa mga pasahero.
Ubos sa Level 8, ang mga airline mahimong mopatuman og fuel surcharge gikan sa P253 ngadto sa P787 para sa mga domestic flights kon itandi sa miaging P117 ngadto sa P342 ubos sa Level 4, katumbas sa pagtaas nga 116% ngadto sa 130%.
Samtang, para sa mga international flights, ang surcharge gikan sa P835.05 ngadto sa P6,208.98 depende sa gilay-on sa biyahe.
Kini misaka usab pag-ayo gikan sa miaging P385.70 ngadto sa P2,867.82, o usa ka pagtaas nga gibana-bana nga 116%.
