GENSAN – Nakaangkon ug dako nga kadaut ang daghang negosyo sa dakbayan human sa taas nga brownout nga nasinati ubos sa SOCOTECO II kagahapong adlawa.
Ang power interruption nga nagsugod alas-8 sa buntag gilauman untang matapos alas-6 sa gabii, apan na lugwayan kini hangtod pasado alas-9, nga maoy hinungdan sa kalapdan nga reklamo gikan sa mga konsumidor ug negosyante.
Sumala sa pipila ka mga tag-iya sa negosyo, dako ang ilang lugi tungod kay naputol ang operasyon sa ilang mga establisyemento, ilabi na kadtong nagasalig sa kuryente sama sa mga laundry shop, restaurant, ug mga printing services.
Daghang pagkaon ang nasayang ug pila usab ka mga empleyado ang napugos nga mo-undang sa trabaho tungod sa kainit ug kakulang sa suplay sa kuryente.
Sa pikas bahin daghang residente usab ang miingon nga ang maong kahimtang nagpahinay sa dagan sa ekonomiya sa dakbayan, ilabi na karon nga duol na ang Batang Pinoy 2025 diin daghang bisita ang gilauman.