GENSAN- Ginasulbad na sa SOCOTECO II ang hinungdan sa system loss pinaagi sa pag-inspeksyon sa mga metro o kwentador sa kuryente.
Gibutyag ni General Manager SOCOTECO II Geronimo Desesto nga ang unang hinungdan mao ang technical loss, nga resulta sa pisikal nga kondisyon sa mga kagamitan sa distribusyon sama sa mga transformer, linya, ug uban pang electrical equipment.
Giingon niya nga ginabuhat pa ang mga assessment aron mahibal-an kon kwalipikado pa ba ang mga kagamitan ug kon magamit pa ba kini og epektibo.
Ang ikaduha nga hinungdan mao ang non-technical loss, nga naglakip sa mga sayop sa pagbasa sa metro, sayop sa billing, ug ilabi na ang pilferage o pagpangawat sa kuryente, nga giila nga mao ang labing dako nga rason sa pagkawala sa kita sa kompanya.
Gipasabot niya nga ang metro maoy giuna sa tanang gi-inspeksyon tungod kini ang responsable sa pagsukod sa konsumong enerhiya.
Gilauman usab sa SOCOTECO II nga pinaagi sa pag-inspeksyon, matagaan og tukmang solusyon ang isyu sa system loss ug mapaayo ang serbisyo sa kuryente.
