GENERAL SANTOS CITY – Suspendido karon ang klase gikan sa pre-school hangtod elementarya sa tanang public ug private schools sa GenSan, tungod sa Bagyong Chedeng.
Base kini sa gipagawas nga deklarasyon sa lokal nga panggamhanan, human gideklara kagahapon sa Pagasa ang signal number 1 sa siyudad, kung asa ning adlawa ang pag-landfall sa nasampit nga bagyo.
Hinungdan nga naka-full alert ang City Distaster Risk Reduction and Management Council sa GenSan, apil na ang mga kasikbit probinsya ug siyudad, aron gilayong makareponde sa unsa mang posibleng epekto sa bagyo.
Kahibaluan nga kagabii, nakasinati ug hinay hangtod sa kasarangan nga pag-ulan ang GenSan ug ubang bahin sa SOCCSKSARGEN area.
Hinungdan nga nagpagawas na usab ug susamang suspension of classes sa pipila ka lugar sa Sarangani sama sa Alabel, Malapatan, Glan at Malungon.
Kahibaluan nga medyo mihinay ang paglihok sa Bagyong Chedeng, samtang gapadulong sa direksyon sa Davao Occidental.
Base sa 5am Severe weather advisory sa Pagasa, gikatakdang mag-landfall si Bagyong Chedeng sa eastern coast of Davao Occidental, alas-2:00 – 6:00 ning buntaga.
Apan gilaumang muhuyang pa kini ug mahimo na lamang usa ka Low Pressure Area human mag- landfall.
Karong adlawa, makasinati gihapon ug moderate to heavy rains sa Surigao del Sur, Agusan del Sur, Davao Region, SOCCSKSARGEN, ug ubang bahin sa Northern Mindanao, Bangsamoro ug Zamboanga Peninsula.
Ulahing namatikdan ang sentro sa Tropical Depression “CHEDENG” sa 105 km East sa General Santos City. Galihok kini sa direksyon nga West Southwest sa gipaspaspon nga 15 kph.
Aduna kini maximum sustained winds nga 45 kph ug haguros nga 60 kph.
Tungod niini, nakataas gihapon ang tropical cyclone signal number one sa Davao Oriental, Compostella Valley, Davao del Sur, Davao City, General Santos City, Davao Occidental, southern portion of Davao del Norte including Samal Island, eastern portion sa North Cotabato, eastern portion sa South Cotabato, eastern portion sa Saranganiug eastern portion sa Sultan Kudarat.
