Gidakop sa Criminal Investigation and Detection Group (CIDG) ang laing suspek sa pagpatay kang 2024 Mutya ng Pilipinas-Pampanga candidate Geneva Lopez ug sa iyang Israeli fiancé nga si Yitshak Cohen.
Sa press statement, ang CIDG nagkanayon nga ang pagdakop nahitabo niadtong Marso 18, 2025, sa Barangay Care, Tarlac City, isip kabahin sa padayong paningkamot nga mahatagan og hustisya ang mga biktima ug ilang mga pamilya.
Ang suspek nga giilang si “Jay,” nasikop sa CIDG Tarlac Provincial Field Unit ubos sa Warrant of Arrest for murder (Article 248 of the Revised Penal Code), nga giisyu sa Regional Trial Court (RTC) Branch 109 sa Capas, Tarlac niadtong Marso 10, 2025.
Si Jay maoy ikaupat nga suspek nga nasikop gikan sa lima ka akusado sa pagpatay kang Lopez ug Cohen, ug ang CIDG miila kaniya nga Most Wanted Person sa regional level sa Central Luzon.
Si Geneva Lopez ug ang iyang pamanhunon nga si Yitshak Cohen namatay niadtong Hulyo 6, 2024, dihang nadiskubre ang ilang mga lawas sa quarry site sa Barangay Sta. Lucia, Capas, Tarlac.
