GENERAL SANTOS CITY – Gituhu-an nga nagtago lang dinhi sa syudad ang suspek nga namusil sa iyang higala nga sakop sa Barangay Covid Control Forces (BCCF).
Kini ang pagduda ni Police Major Richard Ybañez, hepe sa Tambler Police Station sa padayon nga manhunt sa nagpangalan ug Kagi Musa nga taga Cotabato City.
Matud sa opisyal nga maglisod paggawas sa syudad ang suspek tungod nagpatuman sa hugot nga seguredad ang dakbayan sa mga checkpoint pagawas sa lugar.
Gani nagpabilin nga kritical ang biktima nga si Alex Sampulna, 40 anyos residente sa Tambler nga gipusil sa suspek nakalabay nga adlaw.
Gilantaw nga personal ang rason sa pagpamusil sa suspek gamit ang caliber .45 pistol human gibastos matud pa sa biktima ang misis sa suspek.
Gibutyag usab sa opisyal nga nagpadayon ang ilang pakiglambigit sa mga Purok Opisyal aron mamonitor ang presensya sa suspek.
