Gihulagway sa mga imbestigador ang suspek sa pagpamusil sa eskwelahan sa Minneapolis nga obsession ang ideya sa pagpatay sa mga bata nga naga ampo sa Annunciation catholic church.
Ang hepe sa Minneapolis Police nga si Brian O’Hara miingon nga ang suspek nga si Robin Westman, 23, mipatay sa duha ka mga bata ug naka-angol sa 18 pa, apan ang namusil walay motibo sa krimen nga gibuhat.
Nigawas sailang imbestigasyon nga ang suspek ang daw nasuko sa tanan ug gusto lang niini patyon ang mga bata.
Gikumpirma sa ilang mga pamilya ang identity sa mga biktima nga sila si Fletcher Merkel, 8 anyos, ug Harper Moyski, 10 anyos.
Base sa mga detalye nga gipagawas sa mga opisyal kalabot sa background sa suspek, si Westman nagtungha kaniadto sa tunghaan sa simbahan ug didto usab nagtrabaho ang iyang inahan.
Sa usa ka news conference, gibutyag ni US Attorney General for Minnesota Joseph Thompson nga ang suspek nagpahayag og kasuko sa daghang mga grupo, lakip ang komunidad sa mga Jewish ug kay US President Donald Trump.
Kini ang nalatid sa mga note nga gibilin sa suspek kinsa namatay usab human sa pagpusil sa kaugalingon.
Sumala sa Federal Bureau of Investigation Director Kash Patel, ang suspek nagbilin ug daghang anti-Catholic ug anti-religious references nga kasagarang gisulat sa Russian Cyrillic alphabet sa mga pusil ug mga notes nga nadiskobrehan sa mga imbestigador.
Gihulagway usab niya ang pag-atake isip usa ka domestic terrorism nga gipalihok sa pagdumot.
