Nadakpan sa mga awtoridad ang babayeng suspek sa pagdagit sa usa ka bag-ong natawo nga bata sa South Cotabato Provincial Hospital, karong hapon, human kini unang gikuptan sa mga personahe sa usa ka pribadong ospital sa Koronadal City.
Sumala sa inisyal nga impormasyon, ang mga security ug staff sa nahisgutang ospital nakamatikod sa kadudahang pamatasan sa suspek nga nagkugos sa bata ug diha-diha dayon siyang gipahunong samtang giimbestigahan ang iyang pagkatawo.
Dinhi, nadiskobrehan nga ang sinina ug estilo sa pagdala sa babaye nahiuyon sa deskripsyon nga gihatag sa pamilya sa nawala nga bata.
Gi-report dayon sa mga tagdumala sa ospital ang insidente sa pulisya, hinungdan nga dali nga miresponde ang mga personahe sa Koronadal CPS ug gidakop ang babaye.
Nabawi ang bag-ong natawo nga bata nga anaa sa maayong kondisyon ug gipaubos dayon sa medical check-up sa wala pa kini gibalik sa mga ginikanan niini.
Mahinumduman nga ang suspek nagpakaaron-ingnon nga usa ka staff sa ospital samtang gidagit ang bata gikan sa provincial hospital sa miaging adlaw, nga nakahatag og dakong kahadlok sa pamilya ug sa publiko.
Si Ryan Malinog, amahan sa bata, ug ang iyang asawa mapasalamaton kaayo human luwas nga nabalik kanila ang ilang bata.
Sumala sa pamilya, ang diha-diha nga pagkadakop sa suspek usa ka dakong kahupayan.
Sa pagkakaron, nagpadayon ang interogasyon sa babaye samtang gitino sa mga imbestigador ang tinuod nga motibo sa krimen.
Ang suspek nag-atubang og mga kasong kidnapping ug serious illegal detention.
