GENERAL SANTOS CITY – Blangko pa ang San Isidro PNP sa motibo og ilhanan sa mga suspek sa ulahing pagpamusil patay nga natigayon sa ilang area of responsibility.
Giila ni PCapt. Brent Ian Salazar, hepe sa San Isidro Police Station ang biktima nga si Arjay Dignadise, 33 anyos, usa ka matadero nga residente sa Purok 9 Paradise Brgy. Mabuhay ning dakbayan.
Mismo ang kabanay ang namahayag nga kanhi gagamitan og gabaligya og iligal nga droga ang biktima.
Sa pakighinabi sa Bombo Radyo, gibutyag sa kabanay nga dili buot magpaila sa iyang pangalan nga ipukaw ang biktima sa anak sa uyuan niini tungod adunay nangita kaniya hinungdan na gigawas sa nasampit.
Sa iyang paggawas, miduol ang duha ka wala mailhing lalaki og gisultihan sa biktima nga basin nasayop lang ang mga nasampit sa ilang pasangil apan gipusil gihapon.
Nakadagan pa ang biktima apan gipusil sa mga suspek hinungdan nga nakaangkon og tulo ka samad pinusilan nga hinungdan sa hinanali niining kamatayon.
Sa pamahayag sa kabanay, ilang nakita nga upat ka lalaki ang suspek sa pagpamusil nga paspas nga mipalayo sa lugar human ang gihimong krimen.
Sa karon padayon pang nangalap og impormasyon ang kapulisan alang sa imbestigasyon nga gihimo aron masulbad ang krimen.
