TACURONG CITY – Patay ang usa ka suspek sa ambush incident sa gipahigayon nga police operations sa Purok Yellow Bell, Brgy. New Isabela, Tacurong City kagahapong adlawa.
Matud ni Police Brig. General Jimili Macaraeg, regional director sa Police Regional Office 12, nag-atubang og kasong murder ug frustrated murder ang namatay nga suspek nga si Abdulkarim Hasim alyas Boy Jacket.
Base sa taho, padung na unta mosulod ang mga operatiba sa kapulisan sa balay nga gitagoan sa suspek dihang kalit kining nagpabuto sa iyang armas nga miresulta sa pagbinayloay og mga bala ug miresulta sa kamatayon ni alyas Boy Jacket. Matud kang Police Brig.
General Macaraeg, ang nasangpit nga suspek maoy gitudlong responsable sa pag-ambush kang PLt. Reynaldo Samson, kanhi hepe sa Ampatuan Municipal Police Station niadtong milabayng Agosto 30, 2022.
Kahinumdoman nga gi ambush ang grupo ni PLt. Reynaldo Samson kaniadto samtang paingon sa target aron i-serve ang warrant of arrest sa kasong robbery with intimidation sa Barangay Kapinpinlan, Ampatuan, Maguindanao.
Kalabot niini, gidayeg ni Macaraeg ang mga sakop sa kapulisan ug operatiba nga nangulo sa nasangpit nga operasyon bisan pa man kung miresulta kini sa kamatayon sa target nga suspek.
