GENERAL SANTOS CITY – Nangayo og pasaylo ang sikad driver nga nailhan lamang sa alyas “Jun” ngadto sa pamilya sa usa ka minor de edad human niya kining sulayan og lugos sa Purok Mudia Extension, Barangay Labangal ning dakbayan niadtong milabay nga gabii.
Giangkon sa suspek nga gisuwayan gayud niya og panamastamas ang biktima apan wala kini madayon kay naluoy daw siya niini. Matud pa sa report, gidala sa suspek ang pasahero ngadto sa usa ka bakanteng luna ug tuyoan unta nga luguson, apan iyang gipanghimakak ang alegasyon nga gisumbag niya ang biktima.
Mipasabot pa ang suspek nga iyang giatubang nalang ang biktima aron ihatud balik, apan paspas kining midagan padulong sa ilang kabalayan ug nangayo og tabang sa mga silingan hinungdan nga nadakpan dayon siya.
Samtamg matud ni Police Major Miguel Angelo Quidilla, station commander sa Makar PNP, napasakaan na og kaso ang suspek ug kasamtangan kining nag-atubang sa hustisya tungod sa iyang binuhatan.
