GENSAN – Gilayong gipalubong sa iyang mga kabanay si Benzaid Nilong, human napusilan-patay sa kapulisan sa natigayong shootout miaging gabii sa Purok Masagana Brgy Pagalungan, Polomolok, South Cotabato.
Mibalibad na sila sa paghatag ug komento sa pagkamatay sa ilang mahal sa kinabuhi, apan matud sa pamunuan sa Polomolok Municipal Police Station, dili sila angayang magkumpiyansa gumikan posibleng magretaliate ang mga suspek, hilabi na nga nakasibat ang upat ka kauban niini.
Kahibaluan nga base matud pa sa report, pulos notorius nga holdaper ang mga suspek ug may kalambigitan usab sa Ansar Al-Khilafa Philippines.
Apan gibutyag ni Police Chief Supt Marcelo Morales nga ginaberipika pa nila ang maong impormasyon.
Ginasusi usab matud pa kon may kalambigitan ang mga nahisgutan sa pagpatay sa kanhing deputy commander sa nahisgutang presinto nga si S/Insp. Hernan Gabat.
Hinungdan nga gipailawom na sa ballistic examination ang mga bala nga narekober sa lugar, aron matumbok kon susama sa gigamit sa pagpatay kang Gabat.
Sa karon gimando ni Gen. Morales ngadto sa kapulisan nga ipadayon lang ang pagpahigayon ug law enforcement operations sa tibuok rehiyon batok sa mga kriminalidad sama sa pagpatay, holdap ug robbery.
