GENERAL SANTOS CITY – Patay ang usa ka wala pa mailhing suspek sa pagpangawat ug usa ka traysikad human misukol sa mga otoridad.
Batay sa report sa sa Lagao Police Station, ala-1:00 sa kaadlawon, Miyerkules, dihang gi-report kanila ang kalabot sa pagpangawat sa traysikad nga maneho sa usa ka Eduardo Tampos Tubalado Jr., nga natigayon sa Sunrise Village, Brgy Lagao ning siyudad.
Gilayong miaksyon ang kapulisan kung asa nakasugat nila ang maong sikad samtang maneho sa suspek sa may Prk 9 Brgy Katangawan.
Giharang kini sa kapulisan, ug gihangyo nga malinawong mutahan. Apan inay nga mutahan, minaog sa sikad ang suspek bitbit ang usa ka 18-pulgadang sundang ug misulay ug atake sa mga pulis.
Usa kanila ang natumba, hinungdan nga napugos ang maong pulis nga magpabuto ug armas ngadto sa suspek.
Naigo ang suspek ug nadala sa Dr. Jorge Royeca Hospital apan gideklarang dead on arrival.
Gilayong gikustodiya sa kapulisan ang sikad alang sa mga gikinahanglan nga documentation, samtang ang suspek ang nagpabilin karon sa morgue sa naasoy’ng tambalanan.
